由2019年10月1日起，紐西蘭政府規定來自免簽證國家或地區 (包括香港﹑台灣) 既旅客必須係前往紐西蘭前申請電子簽證NZ Electronic Travel Authority（NZeTA）。如果你係10月1日或之後從免簽證國家或地區出發，就要申請NZeTA啦。
咩係NZeTA ？
NZeTA (NZ Electronic Travel Authority) 即係紐西蘭電子簽證，為左改善國家同邊境安全而設，可方便紐西蘭移民局預先過濾﹑檢查並確認旅客資料，確定無可疑既人就可以順利通過 NZeTA既申請。費用係NZD $9 (用電話App申請) 或 NZD $12 (用網頁版申請)。
咩係IVY？
IVL (IVL -International Visitor Conservation and Tourism Levy)即係國際旅客保育及旅遊稅，為左持續保護紐西蘭既天然資源及生物多樣性而設。由2019年7月1日起開始徵收"國際旅客保育及旅遊稅 ，"每人NZD $35，費用會係旅客申請 NZeTA時一齊徵收。
點樣申請 NZeTA?
大家可以用電話App或者上紐西蘭官方網站事先填妥以下基本個人資料，大概需時10分鐘：
。姓名
。出生日期﹑地點
。現居地址
。護照＆其他相關資料
之後用信用卡俾錢，然後電腦系統審批 NZeTA。下面會有詳細步驟圖示嫁。
成功提交左申請之後，大概 10 分鐘 至72 小時就會有審查結果嫁啦。不過大家最好提早申請，以免無法順利入境。
NZeTA有效期為兩年，兩年期內可多次進入紐西蘭，每次逗留唔可以超過 90 日。
電話App同網上申請NZeTA有咩分別？
。費用
- 用電話App申請只需NZD $9，比用網頁版申請NZD $12 平NZD $3。
。操作
- 用電話App需掃瞄護照上既條碼，然後護照內既個人資料會自動輸入App，十分快捷；不過大家都要檢查下有冇錯嫁。而網頁版就要大家一個個去輸入啦～
- 用電話App需即時用電話相機影大頭相，所以申請人必需係現場。而網頁版就唔使拍攝，所以幫人申請既話就比較方便。
常見問題
1.如果只係係紐西蘭轉機，需要申請 NZeTA 嗎？
需要，不過可以唔使俾 IVL (國際旅客保育及旅遊稅)。旅客填妥個人資料後，於問題「Will you be staying in New Zealand?」選擇 No，咁就唔使俾 IVL啦。
2.點解用電話App填好曬資料，但係點極俾錢都冇反應？
我都試過呢個情況，之後用第二張信用卡又得左。
3.如果係申請超過 72 小時都仲未收到電郵確認信，可以點做？
。可以搵下垃圾郵件有冇，確認信既寄件者係“no-reply@online.immigration.govt.nz ； 而標題開頭係 “New Zealand Electronic Travel Authority"。
。可以上紐西蘭移民局網站查詢，若果狀態顯示為 Issued，就代表申請成功。
。若果想補發確認信或者確認下資料填得啱唔啱，就要打電話去紐西蘭移民局+64-9914-4100 查詢啦。
4.如果已完成 NZeTA申請，但發現資料填錯左，咁點算？
。如果只係以下既小錯誤，可以上網填妥更改資料申請表。
- 若舊護照遺失、被偷或者更換，可以用新護照資訊提交更正申請表
- 更新電郵地址
- 串錯字或打錯數字
如果唔係上述小錯誤，就要重新申請NZeTA啦。
我試過因更換護照而要求更改NZeTA資料，大概等左6日先收到當局既確認信。
5.如果已完成 NZeTA申請，後來取消去紐西蘭，可唔可以申請退款？
唔可以。當申請已經完成，無論申請成功或者被拒絕，都唔可以退款，因為款項包含左審查既操作費用。
6.同一部電話可唔可以申請2個人既NZeTA?
可以。當申請完第一個人之後，只要點擊右上角齒輪形－＞點擊 “Purge all data (清除紀錄)” 就可以填下一個人啦。
網頁版NZeTA 申請程序
1. 點撃紐西蘭官方網站，然後填妥以下護照資料：
2. 填妥以下基本個人資料：
如果只係係紐西蘭轉機，請係問題＂Will you be staying in New Zealand＂，選擇＂No".
3. 答完以下既問題，就可以點擊 ＂Review and Confirm (確認並檢查)＂
4. 核對所填寫既資料是否正確。如果正確無誤，請點擊＂Confirm (確認)＂
5. 閱讀聲明，清楚了解並接受聲明就打勾勾 ，然後點擊 ＂Confirm (確認)＂
6. 提交申請 及 付款
7. 申請完成並等待審批結果
8. 審批結果一般會係申請後10 分鐘 至72 小時會發送到申請者所填既電郵。 - 確認信既寄件者是" no-reply@online.immigration.govt.nz "
- 而標題既開頭係“New Zealand Electronic Travel Authority"
- 見到＂Status: Issue ＂就代表申請成功啦!!
電話App申請程序
1.先下載App “NZeTA”。
2. 打開 App－＞點擊 “Begin (開始)”－＞點擊 “Agree (同意)”
3. 掃描護照最下面既兩行文字，如下圖
4. 影大頭相 (App內有影片示範拍攝要求)
5. 再次確認護照資訊同大頭相係咪清晰，確認好之後就點擊 “Confirm (確認)”。
6. 答完以下問題，就可以點擊 “Continue (繼續)”。
7. 點擊”Agree (同意)” 後就可以進行付款
8. 申請完成並等待審批結果
9. 審批結果一般會係申請後10 分鐘 至72 小時會發送到申請者所填既電郵。 - 確認信既寄件者是" no-reply@online.immigration.govt.nz "
- 而標題既開頭係“New Zealand Electronic Travel Authority"
- 見到＂Status: Issue ＂就代表申請成功啦!!
撰文: So ︳PixsoulHK 隊員: Jowy & So
更多文章..
Comments